Tulis sa Metro Cebu dili pa alarming - Alarcio

Dili alarming ang sunod-sunod nga krimen sama sa tulis nga nahitabo sa Metro Cebu sumala pa sa hepe sa Police Regional Office 7, Chief Supt. Silverio Alarcio Jr.

Kini ang iyang gipadayag atol sa 888 News Forum sa Parklane Hotel kagahapon kinsa siya ang mamumulong diin gituki ang kahimtang sa kalinaw ug kahusay sa rehiyon ilabi na sa Metro Cebu.

Matud pa ni Alarcio nga duna sila'y binuwan nga monitoring sa mga panghitabo sa rehiyon ug ilang nakita ang pagminus sa kriminalidad itandi sa miaging tuig.

Si Alarcio miingon nga naukay lang ang Metro Cebu gumikan sa nahitabong pagpusil patay nilang Carmela Cabañog, usa ka tinun-an nga giilogan sa iyang cellphone ug ni Narciso Damole, bank manager sa dakbayan sa Mandaue nga gipusil patay ug gitulis samtang nag-ilis sa ligid sa iyang sakyanan sa Mandaue Reclamation Area.

Sukad sa Enero hangtud Agosto ning tuiga, sa tibouk rehiyon, nikunhod og 7 porsyento ang kriminalidad samtang 20 porsyento sa dakbayan sa Sugbo, 13 porsyento sa dakbayan sa Mandaue ug 39 porsyento sa dakbayan sa Lapu-Lapu.

"There is actually a reduction of crime volumes," nagkanayon si Alarcio.

Apan iyang giklaro nga dili kini igo sa ilang performance sanglit ilang tinguha nga moubos pa ang kriminalidad aron pagseguro nga luwas ang umaabot Asean Summit.

"We want more to convince the people that the police is capable of providing security," dugang pa ni Alarcio.