Lolo patay sa aksidente

Namatay sulod sa tambalanan ang usa ka lolo nga nadasmagan og sakyanan samtang milabang kini sa pikas dalan didto sa Pakigne, Minglanilla niadtong Domingo sa buntag.

Segun sa report ang biktima gidala pa sa tambalanan sa wala mailhing drayber sa Pajero nga nakadasmag uban sa usa ka drayber sa habalhabal ug pagkahuman gibiyaan sulod sa tambalanan

Ang biktima giila sa kapolisan nga si Apolinario Cabaluna, 84, minyo ug nagpuyo sa Tungkil, Minglanilla.

Ang gitumbok nga nakadasmag mao ang usa ka Pajero kolor itom dunay marka sa kilid Turbo nagtangag sa plaka JCV 104 gikan sa habagatang bahin paingon dinhi sa dakbayan sa Sugbo.

Si Cabaluna nakaangkon og grabeng samad ug bun-og sa kalawasan ang gidali pagdala sa usa sa mga tambalanan dinhi sa Sugbo apan duha ka oras ang milabay nakabsan gyud sa iyang kinabuhi.

Apan sa gihimong follow-up sa Banat News kagahapon sa hapon ni PO1 Abraham de Jesus, desk officer sa Minglanilla Police Station, nasuta nga ang maong Mitsubishi Pajero Wagon gimaneho ni Dr. Jose Torres Capilla nga taga lungsod sa Carcar.