Ang suspek (ngan gipugngan sa Banat News) sumala pa nailhan sa usa ka witness nga pasahero ra usab sa maong PUJ niadtong tungura tungod kay kababata niya kini ug silingan diha sa Inayawan.
Gibutyag ni SPO3 Alex Dacua nga duna pay usa ka witness nga mitawag sa ilang buhatan kagahapon nga mipresentar nga motestigo sa maong krimen ug moluwat og testimonya.
Nunot sa maong kalambuan, ang kapolisan duna nay upat ka mga lig-ong testigo batok sa suspek, matud pang Dacua nga mga eye witnesses ang mga testigos ug diha mismo sa PUJ atol sa hitabo.
"Kining atong usa ka witness nga gipaabot mao ni makapalig-on pag-ayo" sumala pang SPO1 Jay Yballe nga usa sa mga imbestigador sa kaso.
Ang mga kabanay ni Cabañog miadto kagahapon sa Homicide Section aron pormal nga misang-at og kaso.
Ang amahan ni Cabañog nga si Leon,51, sa pakighinabi sa Banat News nagkanayon nga hustisya ang ilang gipangayo sa kamatayon sa kinamaguwangan niyang anak.
Matud pa niya nga gipasaligan og scholarship ang duha ka manghod ni Carmela nga sila si Glyza,16 ug Jundel,13. Apan tungod sa nahitabo sa ilang maguwang mipadayag og kahadlok ang duha nga manganhi sa Sugbo aron pag-eskuyla.
"Nagpanghadlok lagi sila ginerbiyos siguro tungod kay bag-o pa man nahitabo,pero siguro sa kadugayan mosugot ra sila kay sayang man sad," asoy pang Leon kinsa mibuhi sa iyang pamilya pinaagi sa pagbaol.