Usa sa mga policewoman nga gikan sa maong rehiyon ang mitug-an sa Banat News nga sulod sa tulo ka bulan nilang pagkadestino dinhi sa Sugbo wala sila makadawat og suhulan.
Sagad kanila naputos na og utang sa mga karenderya duol sa ilang gipangpuy-an ug gidestinuhan ug ang uban mao pay padalhan og kwarta sa ilang mga kabanay sa Zamboanga aron dunay magamit nga panggastos dinhi sa Sugbo.
Si Chief Supt. Silverio Alarcio mitug-an sa mga sakop sa media kagahapon nga mipagawas sila og P100,000 gikan sa pundo sa ilang buhatan aron ipahulam una ngadto sa maong mga FTPs.
Matud pang Alarcio nga iya nang gipaninguhaan nga mapaabot sa kadagkoan sa PNP sa kauluhan ug sa rehiyon 9 ang maong problema.
Ang PRO9 mipadala dinhi og usa ka gatos nga FTPs uban ang usa nila ka supervisor, sa unang bulan nila dinhi malaumon ang mga FTPs nga walay aberya ang ilang sweldo dugang pa usab ang pahibalong duna silay madawat nga binulang allowance gikan sa mga dakbayan diin sila madestino.
Wala pa usab matino kung unsay hinungdan sa maong aberya apan sagad kanila karon naputos na og utang, mapasalamaton hinuon ang pipila kanila sa boluntaryong pagtunol kanila og pipila ka pisong kwarta gikan sa mga polis nga taga dinhi agi'g pagtabang.
Ang ubang mga FTPs gikan sa ubang rehiyon wala hinuon makasinati og problema susama niini gawas lang sa problema nga wala silay armas.
Samtang gibutyag ni Alarcio nga ang umaabot nga 3,000 ka mga armas nga pinalit sa PNP nga ipadala dinhi sa Sugbo dili ipagamit sa mga FTPs sanglit hatagan og prayoridad ang mga nag-unang batches sa milabay'ng tuig tungod sa kakulang sa pundo.
Matud pa sa opisyal kadtong mga polis nga dunay personal nga armas dili na usab hatagan og armas.