Magtiayong pusher nakaipsot apan ilang 'parok' natanggong

Nakaikyas sa gipahigayong pagpangronda sa kapolisan ang magtiayon kinsa mga suspetsado sa pagpamaligya og shabu apan ang gikatahong "parok" o runner sa duha maoy nasikop niadtong Sabado sa hapon diha sa Sityo Hawod Barangay Bulacao siyudad sa Talisay.

Nagtingkagol sa Talisay detention cell si Ignacio Bodo hingkod ang panuigon temporaryong nagpuyo sa maong lugar human kini masignit sa mga polis sa Talisay dihang mitunol ug duha ka paketeng shabu ngadto sa poseur buyer.

Ang magtiayong Norberto ug Janet Cabriana residente sa nahisgutang lugar mao unta ang tumong sa buy bust operation nga gipahigayon sa mga polis apan ang duha daling nakaikyas.

Si PO3 Rey Bucao polis sa Talisay mibutyag kagahapon sa Banat News nga nabiyaan sa magtiayong Cabrian ang usa ka medium nga paketeng shabu sa ilang pag-ikyas.

Matud ni Bucao nga si Norberto nasikop na nila kini sa milabay'ng tuig tungod sa ginadiling drugas apan nakapiyansa ang suspetsado tungod kay possession lang kaso niini.