Nahibaw-an lang kini dihang dihay mga batang nagduwa diha sa sam-ang sa Lorega ug nakakita sa usa ka kandilang gidagkutan diha duol sa usa ka pundok sa yuta nga ila usab gikuykoy.
Matud pa sa kapolisan dunay nakakita sa usa ka babaye ug lalaki nga naila lang sa mga pangan nga Nancy ug Pablo nga maoy milubong sa maong fetus sayo nianang adlawa.
Sa pagsusi sa Homicide Section diha sa maong dapit natino nga ang maong fetus gisulod sa usa ka plastik nga baso ug gilubong sa usa ka tiil nga gilawmong bangag ug gibutangan og kandila.
Ang mga polis nga miresponde sa maong dapit natultulan kung si kinsa ang inahan sa maong fetus nga nailhang si Eduarda Torrefiel, 35, dunay kapuyo ug lumad nga taga Tinago, Dawis sa probinsya sa Bohol.
Si Torrefiel gikatahong gidala sa Vicente Sotto Memorial Medical Center nianang adlawa dihang pagpangihi niini sa ilang kasilyas natagak ang fetus.
Matud pang Torrefiel sa kapolisan nga didto palang siya sa Bohol nianang buntag sa adlaw'ng Sabado misakit na ang iyang tiyan apan wala lang niya kini panumbalinga ug mipadayon sa iyang pagbiyahe panganhi sa Sugbo.
Apan pag-abot niya sa Lorega-San Miguel pagka-alas 7 na sa buntag nataktak na ang bata diha sa kasilyas. Wala pa matino sa kapolisan kung gituyo ba o aksidente ang hitabo apan padayon pa ang ilang gihimong imbestigasyon.