Gitataw ni San Juan Mayor Joseph Victor "JV" Ejercito sa gipahigayong press conference kagahapon sa udto diha sa Sacred Heart Center niining siyudad nga ang oposisyon dili supak sa cha-cha ang wala lang nila mauyoni mao ang "manners ug ang timing" niini.
Matud ni Ejercito nga ang "people's initiative" nga giingong kabubot-on sa katawhan dili matawag nga "people's initiative" usa kini ka "palace initiative" og kabubot-on sa administrasyon.
Si Ejercito nagtuo nga tungod sa pagka-advance karon sa teknolohiya ug pagsaka sa panahon angayan usab nga i-amendar ang 20-anyos na nga konstitusyon.
Gisaway ni Ejercito ang pagduso sa administrasyong Arroyo sa cha-cha tungod kay ang tumong niini dili ang pagpa-uswag sa konstitusyon kundili ang tibook sistemang politikanhon ang gusto niining usbon.
Ang mayor sa San Juan nagkanayon nga angayang sigurohon ang pag-usab sa konstitusyon tungod kay ang konstitusyon usa sa basehan sa moabot nga piniliay para sa kaugmaon sa nasud.
Ang United Opposition nagtuo nga angayang sentrohon ni Arroyo mao ang pagsulbad sa mga problema sa nasud og dili ang cha-cha tungod kay alang niya dili kini maoy makasulbad sa suliran nga giatubang karon sa Pilipinas.
Gihagit ni JV si Arroyo angayang tubagon ang mga pangutana kung lehitimo ba ang pagka-pangulo niini isyu sa kurapsiyon ubos sa iyang administrasyon ug ang mga political killings diin adunay mga politiko nga misupak sa administrasyon nga giingong gigukod sa pamunoan karon.
Lakip sa gihisgutan ni Ejercito mao ang nahitabong pagpamatay sa mga aktibista ug mga periyodista nga angayan tubagon usab sa administrasyon.
Kahinumduman nga ang administrasyon maoy gipasanginlang nagpaluyo sa nahitabong pagpanagit ug pagpatay sa mga aktibista.
Giangkon ni Ejercito nga pulos personal ang iyang tumong sa pagbisita dinhi sa Sugbo ug walay bulok politika.
Usa sa iyang tumong mao ang pagbisita ni Arsobispo Ricardo Cardinal Vidal kinsa nagpabiling mihatag og suporta sa iyang amahan nga si kanhi Presidente Joseph Estrada dihang gipalagpot kini sa pwesto.
Si Ejercito miangkon nga ika-duha pa niyang termino karon sa pagka-mayor sa San Juan ug buot pa siya og ika-tulong termino.
Base sa survey para sa mokandidato isip senador nasulod si Ejercito sa top ten apan matud sa mayor nga aduna siya'y angayang ikonsiderar kini ang desisyon sa oposisyon ug ika-duha mao nga kung ang laing umaabot nga survey nagpakita nga kinahanglan gyud siyang mo kandidato isip senador.