Konsehal misang-at og petisyon batok sa mga homeowners sa Pit-os

Miduso og petisyon sa korte ang magtiayong Avenescio ug Carmelita Piramide kanhi konsehal sa dakbayan sa Sugbo batok sa The Welfare of the Urban Poor and Urbanille Homeowners Association grupo sa urban poor kansang mga miyembro gipasanginlang miputol sa mga kawayan nga gitanom sa lote nga gipanag-iya sa pamilyang Piramide diha sa Barangay Pit-os Talamban.

Base sa giduso nga petisyon sa magtiayong Piramide gihawanan na sa miyembro sa Urbanille ang parte sa ilang lote nga nahimutang diha sa Pit-os,Talamban niining dakbayan tungod kay nagplano kining anha motukod sa ilang mga balay.

Ang magtiayong Piramide kinsa rehistradong tag-iya sa lote numero 14227 nga dunay gilapdong 10,431 metro kwadrado miawhag sa korte nga moluwat og injunction sa Temporary Restraining Order (TRO) ug Writ of Preliminary Injunction batok sa nahisgutang organisasyon.

Niadtong Pebrero niining tuiga ang caretaker sa nahisgutang lote nga si Pedro Luna mipahibawo sa magtiayong Piramide nga ang mga miyembro sa Urbanille namutol og mga kawayan nga gitanom diha sa lote.

Ang maong insidente na-blotter sa Talamban police station diin tulo ka tawo ang naaktohan sa anak ni Avenescio ug Carmelita nga si Averell uban sa ilang abogado nga si Emmanuel Famor Jr. ang namutol sa sobra 30 ka kawayan.

Ang korte nagkanayon nga atol sa pendency sa temporary main action, ang korte miluwat og TRO ug Writ of Preliminary Injunction batok sa grupo para mahunong ang ilang gibuhat nga kalapasan ngadto sa pamilyang Piramide.

Ang maong injunction gideklara kining permamente ug ang nahisgutang organisasyon pabayaron og P50 mil nga actual damages ug P100 mil nga moral damages.