10 ka patrol cars para sa CCPO mangabot na

Makadawat og mga patrol cars ang tulo ka dagkong dakbayan sa Metro Cebu alang sa pagpahingusog sa kampanya batok sa kriminalidad nunot niining nagsunod nga mga insidente sa pagpanulis.

Si Police Regional Office 7 director, Chief Supt. Silverio Alarcio mibutyag sa Banat News nga ipahulam una ang maong mga patrol cars samtang wala pa ang nagsingabot nga kalihukan karong Disyembre.

Ang maong mga patrol cars naggikan sa miabot nga 40 ka Toyota Altis nga gitagana sa summit, ang PNP gikatakdang mopadala dinhi og kapin 200 ka mga sakyanan alang seguridad.

Ang CCPO makadawat og napulo, walo sa MCPO ug lima usab sa dakbayan sa Lapu-Lapu.

Si Supt. Melvin Gayotin nagkanayon nga ang mga patrol cars ibutang sa mga police stations diin dunay mga crime prone areas ang hurisdiksyon.

Ang kapolisan sagad nagproblema og sakyanan aron mahimo ang ilang gimbuhaton apan gumikan sa kawalay budget sa PNP nagmantiner nalang sila sa karaang gipanag-iya sa PNP ug sa mga gipahulam sa mga lokal nga kagamhanan.

Ang Police Deputy Director for Operations and Plans nga si Isidro Lapeña misaad nga human sa ASEAN Summit dunay ibiling mga sakyanan ang PNP alang sa PRO7 aron magamit sa mga lokal nga kapolisan.