2 ka 'tulisan' nakuhaan og mga armas

Duha nakuhaan og armas sa kapolisan gikaingong ika-walo sa listahan sa Pardo Police Station sa mga nag-unang tulisan nasikop samtang kini gituohang nagpaabot og mabiktima diha sa Bamboo Village sa Laguna, Basak ning dakbayan niadtong Huwebes sa gabii.

Ang gidakop giilang si Rusty Luage, 23, residente sa maong barangay kinsa gitug-an sa mga residente sa pagbahas-bahas niini diha sa maong dapit nga may giluklok nga armas.

Ang Pardo Police Station nakadawat og alarma pinaagi sa text a crime hotline kabahin sa usa ka kadudahang tawo diha sa maong lugar nga susamag dunay gipaabot.

Tuod man si SPO4 Henry Eguia sa Pardo Police Station misusi sa maong dapit ug nakit-an si Luage ug gisikop dihang gikapkapan nakuha gikan kaniya ang usa ka kalibre 38 rebolber nga may lima ka buhing bala ug usa ka paketeng shabu uban ang drug paraphernalia.

Ang suspek gikatakdang pasakaan og kasong paghupot og armas ug paghupot og drogas.

Samtang sa laing bahin usa ka habal-habal driver ang nakuhaan og armas dihang gikatahong arogante kini kaayong mikwestiyon sa pagsitar kaniya sa usa ka Field Training Program trainee diha sa eskina sa dalan Salinas Drive ug Gorordo avenue sa Lahug ning dakbayan.

Ang suspek giilang si Eugenio Baylosis Jr., 28, taga Kamagong sa samang barangay.

Ang misitar kaniya giilang si PO1 Wilberto Baylon nga sakop sa Police Regional Office 10 nga gidestino dinhi sa Sugbo uban nila ni PO1 Jubert Bagaporo ug laing FTP nga si PO1 Ianne Fortich nga sakop usab sa PRO7 ug pulos gibutang sa Traffic Group ug maoy gabantay sa maong dapit.

Ang tulo misitar sa suspek ug gipangitaan kini sa iyang lisensya ug dokumentos sa iyang motor apan giingong imbes nga mopakita niini arogante hinuon kining mikwestyon kang Baylon sa katungod niini pagsitar kaniya.

Kini misangpot sa mainitong panaglalis sa duha hinungdan nga miduol sila si Bagaporo ug Fortich. Samtang naglalis nasigpatan ni Fortich ang hawak ni Baylosis nga may migimaw nga puloan sa pusil.

Nianang tungura mitawag og back-up si Fortich sa mga kaubanan diin ang grupo ni SPO1 Ramon Budiongan miabot ug miaresto kang Baylosis ug nakuhaan kini og usa ka rebolber nga "frontier" nga may unom ka buhing bala sa kalibre 5.56 nga bala sa armalite.

Pipila ka adlaw na ang milabay misulbong ang krimen dinhi sa dakbayan bisan sa kadaghan sa kapolisang gipakatap hinungdan nga giulan og pagsaway ang kadagkuan sa maong organisasyon.

Ning bag-uhay lang miangkon si PRO7 direktor Silverio Alarcio nga wala matarong og deploy ang mga FTPs ug wala madumala og maayo hinungdan nga giusab ang ilang deployment ug gi-maximize ang ilang gamit batok sa krimen.

Sagad sa mga FTPs walay mga armas maong dili tuhoan sa mga tawo labaw na sa mga badlungon dugangan pa nga dili sila suhito sa Sugbo ug kulang og sakyanan.