Tulisan gipatay sa iyang biktima

Nailog ang armas nga gidala sa wala mailhing tulisan ug siya na hinuon ang napusilan patay sa iyang gibiktima human sa ilang panaglayog didto sa Sitio Sangi, Calajoan, Minglanilla sa milabay'ng kaadlawon.

Padayon pa karong gisusi sa kapolisan kay wala pa mailhi ang tulisan sa pagsulat ning balita hangtod kagahapon.

Gibanabana sa kapolisan ang namatay nga nagpangedaron og 20 ngadto sa 30 anyos, 5'2" ngadto sa 5'3" ang gitas-on, nagsul-ob og maong nga short, itom nga t-shirt, kulongon ang buhok, kasarangan sa gidak-on sa lawas

Si SPO1 Ricky Larrobis sa Minglanilla nga nahinabi sa Banat News niingon ang biktima ug laing usa niini ka kauban pulos armado nga misulod sa usa ka panimalay

Ang nakapusil sa wala mailhing tulisan mao si Edgar Parella Arellano, 33, ulitawo ug nagpuyo sa Fodarama, Mango Avenue ning dakbayan.

Si Arellano maoy piniyalan sa panimalay ni Odding Tan nga nahimutang didto sa nahisgutang lugar.

Nasayran pasado ala una sa miaging kaadlawon nga si Arellano natulog niadtong higayona sa silong.

Maoy iyang namat-an nga igo nalang siya gipahibalo nga hold-up sa usa sa upat ka mga lalaking tulisan ug dayon gikuha ang iyang kuwarta nga P500

Si Arellano gidala sa tulisan sa may kusina gitionan og pusil apan misuway kini pagsukol sa tulisan hangtod nga nailog ug gipusil diha sa ulo nga maoy gikamtayan dihadiha.

Human sa maong insidente si Arellano boluntaryong mitahan sa kaugalingon ngadto sa kapolisan.

Nakuha nga ebidensiya sa kapolisan sa crime scene mao ang usa ka 357 paltik rebolber, tulo ka buhing bala, duha ka kutsilyo nga may gitas-on nga dose ka pulgadas.