Gikulata, maong bana gipatay

Boluntaryong misurender kagahapon sa buntag sa kapolisan sa Talisay ang usa ka ginang kinsa suspetsado sa pagpatay sa iyang kapuyo niadtong Martes sa gabii diha sa Barangay Campo II, Jaclupan dakbayan sa Talisay.

Si Conchita Labajo, 49-anyos, residente sa maong lugar mibutyag kagahapon sa Banat News nga napatay niya si Antonio Ligaray tungod kay gikulata siya niini dihang nananghid siya nga molakaw para moduwa og baraha.

Ang duha sulod na sa upat ka tuig nga nagpuyo-puyo.

Matud ni Conchita gisukmag ni Antonio ang iyang tuong nawong hinungdan nga nasamad ang iyang ubos nga ngabil ug gibunal-bunalan usab siya niini og olisi nga kawayan.

Gipakita ni Conchita sa Banat News ang iyang tuong kamot nga mihubag nga naigo sa olisi nga gibunal ni Antonio kaniya.

Gitataw ni Conchita nga dili niya tuyong patyon si Antonio ug dihang gibunal-bunal siya niini aduna siya'y nakitang kutsilyo diha sa ibabaw sa ilang lamesa hinungdan nga iya kining gikuha ug gideretso og hansak sa iyang kapuyo.

Kahinumduman nga si Jomil Briones, usa ka security guard nga nadestino diha sa proyekto sa MCWD sa nahisgutang lugar ang gitumbok ni Conchita nga suspetsado.

Nagtingkagol karon sa Talisay detention cell si Conchita ug higpit nga gibantayan para dili makasulod ang mga anak ni Antonio tungod kay sa kalagot niini buot usab nilang pasakitan ang suspetsado bisan naa na kini sulod sa prisohan.