Segun sa report ang biktima bag-o lang nakagawas sa Operation for Second Chance diha sa Kalunasan ning dakbayan niadtong Domingo tungod sa paggamit og rugby.
Ang biktima mao si Brian Laglario Osabel, ulitawo ug residente sa Silangan Uno, Tejero ning dakbayan.
Usa ka wala mailhing lalaki gitumbok nga maoy responsable sa pagpamusil ngadto sa biktima gamit ang wala matinong kalibre sa armas.
Si Osabel nakaangkon og usa ka samad sa iyang sampot ug daling gidala sa mga kabanay sa tambalanan sa Cebu City Medical Center.
Apan pipila lang ka minutos gikan sa pag-abot wala na matabang sa mga doktor sa maong tambalanan kay nakabsan na kini sa kinabuhi.
Ang bala wala makalapos ug misaka hinuon sa ibabaw nga maoy gituohan nga hinungdan sa iyang kamatayon.
Base sa imbestigasyon ni SPO3 Alex Dacua sa Homicide Section ang biktima midagan human kini makakita sa wala mailhing lalaki nga nagbitbit og wala matinong kalibre sa armas.
Matud ni SPO3 Dacua nga gipusil ang biktima sa makadaghan apan usa ra ka bala ang miigo diha sa sampot.
Human sa maong pagpamusil daling miikyas ang mamumuno palayo sa lugar.