Balay gi-rapido; bata na-sampot sa bala

Girapido ang panimalay sa tag-iya og junkshop sa duha ka lalaki nga pulos armado og .9mm ug .45 nga pistol nga miresulta hinuon sa pagkaangol sa 11, anyos nga batang lalaki human maigo sa bala samtang diha sa duol.

Kini nahitabo sa Dumpsite White Road Inayawan ning dakbayan sa milabay'ng alas 11:50 sa gabii.

Ang biktima anaa karon sa tambalanan mao si Van Llanto Cabrera, tinun-an sa grade 2 sa usa ka pribadong tunghaan sa maong lugar.

Si Cabrera nakaangkon og usa ka samad pinusilan sa iyang sampot ug daling gidala sa Cebu City Medical Center

Sila si Rodrigo Dinglasa, 32, minyo ug Marvin Tagonsod, 29 ulitawo, pulos mga sakop sa Barangay Intelligence Network (BIN) uban sa laing kauban nga si Lilia Llanto Rivera, 48, minyo, maoy tag-iya sa junkshop maoy mitaho sa kapolisan.

Daling miresponde sila si PO1 Remos Goco ug PO1 Alexander Mendaros car 239 sa Mobile Patrol Group apan wala na nila madakpi ang duha kay midagan sa ngitngit nga dapit dayon na ngadto sa pagsibat.

Nakuhang ebidensiya sa kapolisan didto sa crime scene mao 14 ka empty shells sa 9mm, duha ka empty shells sa 45 pistol ug laing kabhang sa wala pa matinong kalibre sa armas.

Base sa imbestigasyon ni SPO3 Alex Dacua sa Homicide Section nga sila si Tagonsod ug Dinglasa diha sila duol sa junkshop ni Rivera sa dihang nahitabo ang pagrapido sa duha ka armadong lalaki.

Matud ni SPO3 Dacua ang biktima nadiskobrihan human sa maong insidente nga naigo diay sa iyang sampot hinungdan nga gidala kini sa tambalanan.

Ang Homicide Section padayon pa sa ilang imbestigasyon sa pagtino sa motibo sa krimen usa na niini ang gisubay mao ang kabahin sa negosyo ug gisuta kun kon wala bay kontra ang pamilyang Llanto sa ilang dapit.