P300T sa kawani gikuot

Usa ka kawani sa usa ka mall dinhi sa dalan Colon ning dakbayan ang nabiktima sa gituohang mangunguot diin gikuha ang P300,000 niining kwarta sulod sa pitaka diha sa South Bus Terminal sa dalan N.Bacalso, Pahina Central ning dakbayan niadtong Lunes sa hapon.

Ang biktima nga midangop sa Carbon police station giilang si Leo Canoy, 24, residente sa Orchid Street sa Capitol Site.

Base sa imbestigasyon ni SPO1 Romeo Abellana matud pa ni SPO4 Rica Aying sa Carbon police station nga nakahinabi sa Banat News posibleng gisugo ang biktima sa iyang agalon diha sa Land Transportation Office 7 niadtong tungura.

Giingong dihang mosulod na unta sa maong buhatan si Canoy ug gipresentar iyang bag aron marekisa sa gwardiya iyang nabantayan nga abli na ang bulsa sa bag.

Dihang iyang gisusi, wala na diha ang kolor itom niyang pitaka nga gisudlan sa P300,000, mga ID, ATM, resibo ug importanteng dokumentos.

Sumala pa sa mga polis nga posibleng nabiktima si Canoy sa grupo sa mga mangunguot nga gitawag og "Banite" kun kadtong mangabli og bag samtang ang biktima nagsuot-suot sa bagang pundok sa mga tawo diha sa dalan.