Si Chief Inspector Ambrocio Ibones nagkanayon nga ang Homicide Section na ang mopasaka og kaso batok sa suspek nga si Bryan Sasan, hingkod ang panuigon, kinsa hangtud karon nagtago-tago pa gikan sa kapolisan.
Matud pang Ibones nga sigurado silang si Sasan ang suspek base usab sa impormasyong ilang nakuha gikan sa mga kabanay niini diha sa barangay Labangon.
Gikatahong nadakpan na kaniadto si Sasan sa kapolisan sa ubang kaso apan giangkon ni Ibones nga wala sila makakuha og hulagway niini, giingong kagrupo ni Sasan ang grupo sa mga inilang tulisan nga sila si Abay-abay ug Ritchelle nga maoy mga responsable sa mga pagpanulis sa Highway Tagunol.
Sumala pang Ibones nga mismong ang mga kabanay ni Sasan sa dalan Salvador sa Labangon mibutyag nga ila na kining gikumbinsir pagtahan apan nagmagahi gyud kini ug mas pilion pa niining maghikog.
Ulahing nakit-an si Sasan diha sa Salvador pila ka adlaw human mahitabo ang pagtulis ug pagpatay kang Carmela Cabañog sulod sa PUJ sa Highway Tagunol.
Giingong nangita kini og kwarta aron magamit sa pagbiya dinhi sa Sugbo.
Samtang si Inspector Erlando Metante ang hepe sa Homicide Section mitug-an nga nagpaabot pa sila sa mga kabanay ni Cabañog nga tua sa Ginatilan aron pormal nga mosang-at og kaso lakip na ang usa pa ka testigo nga nakakita sa hitabo.
Sa pagkakaron usa palang ka witness ang gihuptan sa kapolisan.