Dalaga 'lugoson'sa drayber milayat

Milayat sa PUJ nga multicab ang usa ka 18 anyos nga dalaga human kini buot nga lugoson sa drayber didto sa tiilan sa unang taytayan sa Brgy. Pajo, Lapu-Lapu kagahapon sa kadlawon.

Ang biktima nga si Toni (tinuod nga ngalan gipugngan 18, dalaga nga lumad sa sitio Kamansi, Brgy. Esperanza, Danao ug nagtrabaho isip katabang sa Basak, Lapu-Lapu.

Base sa saysay ni Toni, sakay siya sa usa ka multicab nga orange gikan sa Highway Mandaue City ngadto na sa Basak diin siya milingkod sa atubangan sa maong PUJ.

Nakurat na lang si Toni nga kalit mihulga ang drayber kaniya ug mipadayag sa iyang tuyo sa paglugos ni Toni ug dad-on kini sa usa ka hilit nga dapit.

Sa dihang nakaobserbar si Toni nga wala magkomedya ang drayber kalit kini nga milayat sa maong sakyanan ug maayong pagkaligid sa dalan.

Swerte nga ang magtiayong Danilo ug Laarni Inot nga luwan sa usa ka motorsiklo ilang nakita si Toni nga milayat sa maong PUJ ug ila dayon kining gitabang.

Human nga gidala sa magtiayon si Toni sa kapolisan sa dakbayan sa Lapu-Lapu mihimo dayon ug hot pursuit operation ang mga police patrol, apan pakyas kini sa paggukod sa maong PUJ driver.

Si Toni nga nahiagum sa mga pangus ug bun-og gidala sa Lapu-Lapu district hospital alang sa pagpaalim sa iyang samad samtang padayon ang kapolisan sa ilang pag-follow up niining maong kaso.