Ang "Sugbuhi" nga termino maoy gisagop karon nila ni Martinez alang sa sugyot pagtukod og Cebu del Norte, Kongresista Simeon Kintanar para sa Cebu del Sur ug Kongresista Antonio Yapha para sa Occidental, Cebu.
Alang kang Martinez nga dili kini pagdaot sa mga katawhan sa kalungsoran kundili labi kining makapabuhi sa ilang paglaum ug maayong kaugmaon.
Kini tungod kay alang kaniya, ang usa ka gobernador nga gamay rag atimanong mga lungsod masayon alang kaniya ang pagsil-ing sa mga lungsod nga wala pa magkadimao ang kahimtang.
Sa maong hunahuna ni Martinez gisawo kini sa daghang mga molupyo sa lungsod sa Tuburan sa amihanang bahin sa lalawigan sa Sugbo, kinsa matud pa nila sukad pa sa panahon pa ni Magellan, ang ilang lungsod nagpabilin lang gihapong way karsada ang kabukiran hangtod karon.
Si Luis Patalinghug taga Tuburan nagkanayon nga dili na maihap ang mga gobernador nga nakayaka sa Kapitolyo, uban sa mga Kongresista nga nagpuli-puli lang, apan wa gyud makasil-ing sa Tuburan nga wa gyuy kadalanan ang kabukiran niini.
Gani matud pa niya nga usa kini sa hinungdan nga mirebelde pag-ayo ang katawhan sa bukid sa maong lungsod.
Maoy hinungdan nga alang kanilang taga bukid sa Tuburan nga naa sa 500 kapin ka barangay, nga puslan mang way nag-atiman kanila, mas maayo pang suwayan ang Sugbuhi, basin pa sa kagamay nalang nga sakop sa usa ka gobernador dali rang makita ang ilang suliran.