Sad-an sa Guimaras kasuhan

Nag-atubang og kasong administratiba ang Marina, Coast Guard, Sunshine Maritime Corporation ug PETRON human nasuta sa Special Board of Marine Inquiry (SBMI) nga may kalapasan kini sa aksidente sa Guimaras Island niadtong Agosto 11, ning tuiga.

Bisan pa man sa paninguha sa PETRON company nga ma- limpyo ang kadagatan sa Guimaras Island wala kini nagpamatuod nga nalingkawas sila sa kaso nga isang-at sa SBMI ngadto kanila.

Kahinumduman ang Sunshine Maritime Corporation maoy giabangan sa PETRON nga mo biyahe sa produkto niadtong Agosto 11, kalit lang nga nalimbuwad tungod sa dagkong bawod nga nihapak sa ilang barko.

Ang Sunshine Marine Corporation matud pa liable sa maong insidente tungod kay gibaliwala niini ang regulasyon ug polisiya mahitungod sa pagbiyahe ug mga bug-at nga karga ilabina bahin sa pagkarga og fuel.

Gani ang Petron company wala gilingkawas sa maong kaso kay liable usab kini, mahitungod sa overloading of Industrial Fuel Oil (IFO) ilang gitugutan ang maong seafarer nga mokarga bisan pa man og sobra kini kaayo.

Ang MARINA ug Coast Guard gipasakaan usab og kaso tungod sa ilang pagpabaya sa ilang responsibilidad isip mobantay sa mga unexpected incident nga mahitabo sa kadagatan.

Midugang ang SBMI daghan ang rason kon ngano nalunod ang maong barko sa tunga-tunga sa kadagatan ug kini mao ang pagka-incompetence sa kapitan, bug-at kaayong karga ug lisod na pagtimbang. - Gia Racel Pataka'g parking dakpon

Gimanduan ang City Traffic Operation Management (CITOM) sa pagpanakop ug i-impound kadtong mga PUJ ug pribadong mga sakyanan nga masakpang magpataka lang og parking sa kadalanan dinhi sa dakbayan sa Sugbo sa adlaw ug gabii.

Gihingusgan kining maong lakang sa konseho gumikan sa daghang mga reklamo nga nadawat niini nga nagsaway kabahin sa pagpakabuta bungol sa siyudad batok niining mga nanag-iya og sakyanan nga magpataka og parking ug ang uban kanila gihimo nang pribadong garahian ang daplin sa dalan.

Tungod niini mopasar og resolusyon si konsehal Arsenio Pacana nga mag-awhag sa Citom nga estriktong ipatuman ang "Towing Ordinance" ug ang no Overnight Parking daplin sa kadalanan.

Gituohan sa konsehal nga mao lang kiniy bugtong paagi nga ma-disiplina ang mga badlongong drayber ug mga operator aron dili na kini magpataka lang og parking sa ilang mga sakyanan.

Makahasol sa mga sakop sa kabomberohan panahon sa ilang pag-responde og alarma sa sunog sa mga sudlonong lugar.