Dead on arrival sa Cebu City Medical Center ang biktimang si Jurel Cosep, residente sa maong lugar tungod sa daghang igo sa pinusilan diha sa iyang kalawasan.
Usa ka wala mailhing suspek nga itsurahan ug gibana-banang 5'4 ang gitas-on, 24 ngadto sa 27 anyos ang pangidaron ang gitumbok nga mipatay sa biktima.
Sa imbestigasyon sa Homicide Section mitumaw nga nag-estoryahanay ang biktima ug ang silingang uyab nga si Lusile Lataza, 21, nga nagpuyo usab sa maong dapit dihang kalit nga miabot ang suspek bitbit ang wala matinong kalibre sa armas.
Ang suspek daling mipusil sa biktima makadaghang higayon ug daling miikyas.
Ang silingan sa biktima nga si Johnrey Singcot maoy daling midala kaniya sa CCMC apan nakabsan na kini og kinabuhi una pa makaabot sa maong dapit.
Upat ka basiyo sa wala pa matinong kalibre sa bala ug usa ka slug ang napalgan diha sa crime scene sa mga sakop sa Scene of the Crime Operations pinanguluhan ni SPO2 Virgilio Bagasala.
Si SPO2 Alex Dacua sa pakighinabi sa Banat News nagkanayon nga usa pa lang ka bulan ang relasyon sa biktima ug sa suspek apan wala usab nila isalikway nga posibleng may kalambigitan sa gugma ang motibo sa pagpatay lakip na usab ang personal nga kaaway niini.