Manhunt sa suspek sa murder sa lender palapdan

Pagpangita sa suspek sa pagpatay sa tigpatanto diha sa dalan T.Padilla paabton na ngadto sa lalawigan sa Bohol ingon man ubang dapit gawas sa Sugbo.

Si Supt. Melvin Gayotin nagkanayon nga duna nalay pipila ka mga polis dinhi sa lalawigan sa Sugbo nga ipatawag ang ilang susihon ug kung walay matumbok ang mga testigos ipatawag usab ang nadestino sa ubang dapit.

Giangkon ni Gayotin nga naglisod sila karon sa imbestigasyon sa kaso sa pagpatay kang Pilar Hernandez ug sa sekretarya niining si Wevina Pancho nga gipatay sa wala pa mailhing gidudahang polis niadtong Sabado diha sa T. Padilla barangay Tejero ning dakbayan.

Dili palang dugay gipailawom sa police line ang walo ka mga polis sa Cebu Provincial Police Office ug lima gikan sa CCPO. Duna pay laing walo nga susihon gikan sa CPPO ug laing upat gawas sa lalawigan.

Matud pang Gayotin kung wala gihapoy matumbok ang mga testigos magsugod usab sa analisis sa sinugdanan sa hitabo diin ang mga imbestigador mobase sa nakuhang mga ebidensya ug mga sirkumstansya sa hitabo ug kalambigitan sa utangan.

Wala pa gihapon isalikway ni Gayotin nga polis ang suspek tungod sa armas nga gigamit, pamahayag sa testigos, sagad nga mga kliyente polis ra gyud ug nakaila usab sa suspek ang mga biktima.

Ang pagpahigayon og police line-up gihimo sa Homicide Section tungod kay kini maoy paspas nga pag-ila sa suspek kung itandi sa pagkuykoy sa mga ebidensya ug pag-analisar niini.

Sa pagkakaron ang gisaligan sa kapolisan mao ang pamahayag sa mga testigos.

"Kung wala pa gihapon tay ma-pinpoint sa witnesses, magsugod na sad ta sa sinugdanan," asoy pang Gayotin.

Sagad sa mga mangutang kang Hernandez nga nanag-iya sa PRH Lending Investment Inc.mga sakop sa kapolisan gikan sa Central Visayas ug dako ang pagtuo sa mga imbestigador nga ila rang kauban ang suspek.