Kini gumikan sa giingong mga malisyoso ug makapauwaw nga lindog ni Tulfo kang Mangaoang sa dihang gidestino pa siya sa Sugbo.
Si Mangaoang nabalhin na sa Port of Iloilo ug miingon nga karon pa siya nakalugar sa pagpasaka og kaso batok kang Tulfo.
Si Tulfo sa iyang lindog mipasangil kang Mangaoang nga nagdumili sa pagbiya sa Sugbo bisan pa sa kamandoan ni Customs Commissioner Napoleon Morales gumikan sa giingong relasyon nilang Finance Secretary Gary Teves.
Matud pa ni Mangaoang nga ang pagbalik-balik ni Tulfo sa mga pamasangil sa iyang lindog paagi kini sa pangilkil sa magsoong Tulfo.
Matud pa ni Mangaoang nga usa ka tawo nga suod ni Tulfo ang mitawag kaniya nga makigkita sa Manila sanglit may itabang sila alang sa maayong imahen sa Bureau of Customs sa Sugbo.
Wala mosanong si Mangaoang sa maong tanyag apan iyang gilakip ang pamahayag sa usa ka Jimmy Salgado kinsa miangkon nga may kasayuran siya sa giingong kalihukan sa pagpangilkil sa magsoong Tulfo nga sila si Ramon, Erwin ug Raffy.
Ang pamahayag ni Salgado kabahin sa report ni NBI Director Nestor Mantaring nga nagrekomendar sa pagpasaka og kaso batok sa magsoong Tulfo gumikan sa ilang pagpangilkil sa mga opisyal sa BOC.
Giklaro ni Mangaoang sa iyang reklamo nga gipasaka sa piskaliya sa dakbayan sa Sugbo kagahapon nga ang pagpabilin niya sa BOC sa Sugbo naggumikan sa temporary restraining order sa Court of Appeals ug dili tungod sa giingong relasyon niya kang Teves.- Gregg M. Rubio ug Brenda Batuto