Nasaypang pusher giabswelto

Kapolisan napakyas sa pagpakonbikto sa gipasanginlang namaligya og ginadiling drugas tungod sa kalo-ag sa pasangil.

Giabswelto ni Judge Fortunato de Gracia sa Regional Trial Court branch 15 sa kasong kalapasan sa Akta Republika 9165 kun Comprehensive Dangerous Drugs Act Law si Rogelio Manalili taga Tres de Abril, Barangay Labangon niining dakbayan.

Si Manalili nasikop sa kapolisan sa station 10, Barangay Punta Princesa niadtong Septiyembre 28, 2002.

Si SPO2 Eugenio Teves mibutyag sa korte nga sa nahisgutang adlaw mipahigayon sila og buy-bust operation batok ni Manalili kinsa nasakmitan nila og 0.04 ka gramong shabu.

Apan si Teves nagkanayon nga wala siya makaila ni Manalili, sa wala pa mahitabo ang buy-bust operation aduna silay nadawat nga impormasyon kabahin sa akusado.

Milakaw si Teves uban sa iyang mga kaubang polis diha sa nahisgutang barangay para mag-eksperimento kung makapalit ba sila og shabu ni Manalili.

Usa sa witness sa depensa nga si Angelie Reynes, 48-anyos, residente usab sa lugar, tindera og prutas, mibutyag nga niadtong alas 6:00 sa gabii, Septiyembre 28, 2006 mianha siya sa station 10 tungod kay iyang gireklamo si Junjun Salazar kinsa mihulga sa iyang bana.

Apan ang nasikop sa mga polis si Manalili hinungdan nga si Reynes mibalik sa police station para klaruhon nga dili mao ang ilang nasikop.

Si Reynes mipasangil nga ang polis nagkanayon kaniya nga pasakaan nila og kaso si Manalili kay basin pasakaan sila og kaso niini.

Ang korte nagkanayon nga ang mga testimonya sa depensa wala magkatugma ug ang witness niini mihimakak kabahin sa insidente sa entrapment.

Ang testimonya ni Reynes nasuportahan sa uban niining silingan nga nagpamatuod nga ang mga polis mianha sa ilang lugar para sikupon si Salazar kinsa nanghasi tungod sa kahubog.

Apan ang gisikop sa mga polis si Manalili kinsa usa sa nang-usyoso sa pagpanghasi ni Salazar.