Si Viviano Rentillosa, gibana-banang 50 kapin ang edad ug gikaingong lumad nga taga Liburon, lungsod sa Carcar napatay atol sa engkwentro tali sa mga sakop sa 19th Infantry Battalion pinanguluhan ni Lt.Col. Louie Dagoy.
Matud pang Dagoy sa pakighinabi sa Banat News nga ang iyang mga sakop sa Alpha Company ug Reconnaissance Platoon nakasangka ang gibana-banang 20 ka mga sakop sa NPA nga nagpahipi diha sa ka-kogonan sa maong barangay di layo sa mga balay sa mga sibilyan.
Si Rentillosa gikatahong maoy Secretary sa Northern Leyte Front ilawom sa Eastern Visayas Regional Party Committee nga maoy nangulo sa mga rebelde dihang dapita sa Leyte.
Ang maong engkwentro kabahin sa naunang engkwentro tali sa 19th IB niadtong Agosto 30 diin gibana-banang 50 ka mga NPA nga gipanguluhan ni Rentillosa kasamtangang nagpulong-pulong dihang nasugamakan sa militar diha sa barangay Cabungahan sa lungsod sa Villaba.
Patay si PFC Breastheart Bagayo samtang lima ka sundalo ang naangol human sa hitabo, gikatahong dunay nasamdan sa habig sa mga NPA.
Niadtong Lunes subay usab sa mga text gikan sa mga sibilyan sa kabukiran nasubay ang direksyon sa grupo ni Rentillosa ug diha kini maabti sa Libertad, Canangga.
Matud pang Dagoy nga nasayod siyang naa si Rentillosa sa maong dapit gumikan sa nakitang mga machinegun ug M203 grenade launchers sa mga NPA diha sa palibot sanglit ilang protektahan ang ilang lider.
Sa nahitabong kumbate napatay si Rentillosa ug samaran ang tulo niya ka mga close-in security nga daling naguroy sa mga kaubanan.
Nakuha sa militar ang usa ka kalibre 45 diha kang Rentillosa ug mga buhing bala lakip na ang mga subersibong dokumentos.