Experts nanguykoy og kalabira wa makig-coordinate

Grupo sa mga forensic experts gikan sa University of the Philippines nga misusi sa giingong mass grave sa biktima sa mga rebeldeng New Peoples Army kaniadto diha sa sitio Amaga, Bonbonan ning dakbayan wala mananghid sa Cebu City Police Office.

Si Supt. Melvin Gayotin, ang acting police direktor sa dakbayan nagkanayon nga wala siya makadawat og report kabahin sa maong grupo ug wala usab koordinasyon nga gihimo diha sa ilang buhatan.

Sa report sa TV Patrol Central Visayas niadtong milabay'ng Lunes dunay lima ka mga ekspertong pinanguluhan ni Professor Jerome Bailen nga miabot niadto pang Domingo ug nagsugod na og kawot sa gituohang gilubngan sa mga biktima sa mga NPA.

Ang impormasyon gikatahong gibase sa usa ka kanhi sakop sa NPA nga niadtong panahona sa pagpatay 12 anyos pa, gikatahong ang mga biktima gipasanginlan sa NPA nga mga deep penetration agents (DPA) kun espiya nga gitanom sa gobyerno diha sa ilang pundok.

Ang grupo konektado sa Peace Advocate for Justice, Truth and Healing (PATH) nga usa ka non-government organization nga maoy nag-atiman sa mga biktima sa krimen ug pagpangabuso.

"They are doing it at their own risk, they are doing it without coordination, they may be misinterpreted on their actions," asoy pang Gayotin.

Matud pang Gayotin nga mao kini ang problema sa ubang mga pundok nga basta nalang mohimo og mga lakang nga susama niini nga wala manumbaling sa mga awtoridad ug dili mosunod sa mga hustong proseso.

Si Gayotin nagkanayon nga iyang ipasusi sa Service Security Group ang operasyon sa grupo aron matino kung unsay ilang tumong lakip na usab ang paghatag kanila og seguridad.

Sumala pa sa maong report gipangita sa grupo ang patay'ng lawas sa managtiayong sila si Luz Aniasco ug Herculano nga lumad nga taga Ormoc ug kaniadto mga labor leaders ug nawala sukad pa niadtong 1985.