Si Inspector Erlando Metante sa pakighinabi sa Banat News mitug-an nga human sa pakyas nga police line-up niadtong milabay'ng Lunes diha sa Provincial Intelligence and Investigation Branch sa Provincial Police Office ipatawag gihapon ang wala motunghang duha pa ka mga polis dugang usab ang usa ka sakop sa Regional Mobile Group.
Matud pang Metante nga ang pagpatawag kanila karong adlawa wala magpasabot nga sila na maoy gisuspetsahan kundili aron lang pagtagbaw sa kinahanglanon sa pagsulbad sa kasong pagpatay kanila ni Pilar Hernandez ug Wevina Pancho.
Samtang si CCPO director, Supt. Melvin Gayotin nagkanayon nga walay dautan sa ilang pagpa-police line up tungod kay gikinahanglan kini pag-ayo, apan wala siya mopasabot nga mikomentaryo sa paagi sa gihimo sa PIIB.
Matud pang Gayotin nga mahimong di na i-police line up ang nahibiling tulo ug ipatan-aw na lang sa mga testigo. Gikatahong ang mismong testigos ang mitug-an sa mga imbestigador nga polis probinsya ang ulahing tawo diha sa maong buhatan sa wala pa ang krimen madiskubrehi.
Sa pagkakaron hanap pa kaayo ang maong kaso tungod kay nagsalig lang ang kapolisan sa pamahayag sa testigos tungod sa pangangkon niining nakakita og usa ka gidudahan niyang polis nga maoy labing ulahing miadto sa PRH Lending Investment Inc. dihang mipauli na siya sa balay ni Hernandez.
Si SPO2 Jay Yballe miangkon nga naglisod sila karon sa kaso gumikan kay nagbase pa sila karon sa pamahayag nga gihatag sa testigos apan wala gyud makakita sa aktwal nga paghimo sa krimen.
Hinuon kung mailhan na sa witness ang suspek mas mapadali kini aron masunod-sunod na ang proseso sa imbestigasyon.
Samtang si Gayotin sa iyang bahin mitug-an nga andam siyang ipailawom usab sa police line-up ang iyang mga sakop aron makatabang sa pagpadali'g sulbad sa kaso.