LPG Mibuto: 2 patay, 14 angol

Duha ang patay samtang katorse ang nasamdan human miulbo ang usa ka tangke sa liquefied petroleum gas(LPG) diha sa sulod sa usa ka laundry shop sa barangay Basak dakbayan sa Mandaue kagahapon sa buntag.

Ang namatay giilang sila si Felipe Hermoso, nga taga Liloan ning dakbayan ug ang babayeng napusgay sa bildo ang kalawasan nga si Diosdada Jao,48, residente sa maong barangay kinsa gikatahong mopalit unta og sud-an dihang naagi diha sa dapit.

Lakip sa napusgay mao ang tupad nga mga establisamentong Green Peak Wood ug EPE Auto Supply tungod sa kakusog sa pag-ulbo sa maong tangke sa LPG.

Ang Gene's Laundry Shop nga gipanag-iya ni Fortunato Sanchez unom pa lang ka bulan nga nag-operate sa maong dapit ug migamit og LPG aron sa pagpaandar sa ilang dryer machine.

Si Lorna Mercy Robin,kinsa maoy nangabli sa maong edipisyo mitug-an nga samtang nangandam na siya sa mga linabhan usa ka sipang buto ang iyang nadungog ug dihang siya naulian sa panimuot nag-aso na ang palibot ug buskag na ang tibuok nilang buhatan.

Matud pang Robin nga napasok siya sa dryer apan nakaangkon siya og daghang paso sa iyang kalawasan ug nawong.

Ang tanang mga emergency rescue units sa Metro Cebu miresponde sa lugar ug midala sa mga samaron sa Mandaue City Hospital, Vicente Sotto Memorial Medical Center ug sa Cortez General Hospital.

Si Jao maoy namatay diha dayon tungod sa kadaghan sa mga buak nga bildong miigo sa iyang kalawasan samtang si Hermoso nakabsan sa iyang kinabuhi lima ka minutos human siya madangat sa VSMMC tungod sa grabeng igo diha sa iyang ubol-ubol ug kalawasan agi sa bildo.

Sumala pang Sr. Supt. Eduardo Catabas sa Mandaue City Police Office base sa nakuhang mga ebidensya sa mga sakop sa Explosive and Ordnance sa Special Weapons And Tactics walay nakitang mga parte sa posibleng bomba, lama sa pulbura ug detonating cord ug ingon man ang sagad nga makit-an kung bomba ang mibuto nga dakong bangag sa yuta diha sa gikahitaboan.

Usa sa mga polis sa EOD nga misulod sa nabuthan nagkanayon nga nanimahong gas sa sulod ug siya pay mipawong sa tangke diha sa sulod aron kalikayan ang subling aksidente.

Si Sanchez mipasalig nga abagahon ang galastuhan sa mga pasyente samtang giandam na usab sa kapolisan ang kasong reckless imprudence resulting to homicide and multiple physical injuries.

Si Mayor Thadeo Ouano ug Gobernador Gwendolyn Garcia mipahibalong mohatag og hinabang pinansyal sa mga biktima.

Si Ouano namahayag nga walay kalambigitan sa anibersaryo sa 2001 Septiyembre 11 Terror attack sa New York ang nahitabo kagahapon sanglit natunong lang gyud ang aksidente.