Kini gumikan sa ilang paghatag og impormasyon nga ningresulta sa pagkapatay ug pagkasikop sa mga dagkung lider sa New People's Army sa lalawigan sa Sugbo.
Usa kanila ang naghatag og impormasyon sa presensiya sa 30 ka mga rebeldeng NPA sa midnorth area sa lalawigan sa Sugbo.
Ang ikaduha mao usab ang naghatag og impormasyon sa kalihukan sa mga rebelde nga niresulta sa panag-ingkwentro tali sa militar hinungdan sa pagkamatay nilang Jerry Badayos ug Guillermo Alburo.
Ang ikatulo mao ang nakahatag sa impormasyon labot sa pagpangilkil sa mga rebelde sa usa ka kompaniya sa lungsod sa San Fernando nga niresulta sa pagkasikop nilang Sharon Abangan ug Gerard Lavadia.
Matud pa ni Garcia nga ang lakang sa PAITF maoy katumanan sa saad nga mohatag og ganti sa makatabang sa kapolisan ug militar sa pagbungkag sa kalihukan sa mga rebelde sa lalawigan sa Sugbo.
Gipasalig usab ni Garcia ang paghatag og proteksiyon sa mga hingtungdan lakip na sa mga kompaniya nga biktima sa pagpangilkil.
Gipasabot ni Garcia nga bisan gamay ra ang kantidad sa ganti apan ang mahinungdanon mao ang pagdasig sa katawhan nga mohatag sa impormasyon aron mahunong na ang kalihukan sa mga rebelde.
Dugang usab sa gobernador nga ang reward system gituyo aron pagdasig sa uban nga motabang sa militar ug kapolisan.
Usa sa mga nakadawat sa ganti nipadayag nga gawas sa kwarta, nalipay siya nga nakatabang sa kampanya sa kagamhanan batok sa mga rebelde.