Mga polis dagko'g utang susihon sa murder sa lender

Mga polis nga dagko og utang sa PRH Lending Investment Inc. lakip sa susihon sa imbestigasyon kalabot sa pagtulis ug pagpatay sa tag-iya ug sa usa niini ka kawani.

Kini maoy gibutyag ni Inspector Erlando Metante ang hepe sa Homicide Section sa pakighinabi sa Banat News kagahapon gawas pa sa giplanong police line up sa tanang polis dinhi nga nadestino sa Sugbo.

Matud pang Metante nasayod siyang daghang mga polis ang utangan sa biktimang si Pilar Hernandez apan aron masubay ang kaso kinahanglang subayon kung kinsa kadtong mga polis nga posibleng nakautang nga naglisod na sa pagbayad.

"Basta tanang anggulo hasta tanang utangan atong subayon ," asoy pang Metante.

Samtang kagahapon gipagawas na ang cartographic sketch sa gidudahang suspek nga mitulis ug mipatay kang Hernandez ug sa sekretarya niining si Wevina Pancho niadtong Biyernes sa dalan T.Padilla sa Tejero ning dakbayan.

Ang suspek gibana-banang nagpangidaron og 30 ngadto sa 35 anyos, itomon ang pamanit, maskulado apan tiyanon ug natural nga may pagka-kulot ang buhok.

Si Hernandez ug Pancho gipamusil diha sa ilang mga ulo ug dughan sa gituuhang nag-inusarang suspek.

Matud pang Metante nga makatabang ang cartographic sketch sa kaso nga suportahan usab sa testigo ug sa uban pang makuhang ebidensya sa kaso.

Sumala pang PO2 Jessie Yramis sa San Nicolas Police station nga maoy nakadiskubre sa hitabo nga nakatug-an pa si Hernandez sa pangalan sa maong suspek nga usa usab ka polis samtang kini gidala ngadto sa Velez hospital.

Si Supt. Melvin Gayotin ang hepe sa CCPO nagkanayon nga dako ang posibilidad nga polis ra usab ang maong suspek base sa armas nga gigamit niini nga usa ka 9mm kalibre.

Dunay mga mitumaw nga pagdudang dunay posibilidad nga dunay nagpaluyong opisyal nga dunay mga dagkong utang kang Hernandez maoy misugo sa krimen.

Si Police Regional Office 7 director, Chief Supt.Silverio Alarcio sa pakighinabi sa Banat News nagkanayon nga mas maayong maapil usab sa imbestigasyon ang maong posibilidad.

"Maganda 'yan kung mapi-pick up ng mga imbestigador natin, walang problema kahit sino pa iyan basta may kasalanan kakasuhan natin," asoy pang Alarcio.

Sa pagkakaron dako ang pagsalig ni Alarcio sa Cebu City Police Office sa maong kaso gumikan sa maayong lead nga gisubay karon sa mga imbestigador.