Inasal Festival madayon, apan ilisa'g pangalan

Mga organizer sa Inasal Festival sa Talisay padayon gihapon sa ilang plano nga magpahigayon og laing festival niining tuiga bisan pa sa mga kontrobersiya nga nahitabo.

Apan ilisan na kini og laing ngalan imbes "Inasal Festival" karon "Halad Inasal Festival" na ang ipangalan.

Si Konsehal Shirley Belleza kinsa tsirman sa Committee on Tourism, Cultural and Historical Affairs mao gihapon ang mohupot isip over-all tsirman sa maong event.

Kahinumduman bag-o lang si Belleza miduso og resignation para moluwat isip over-all chairman sa Inasal Festival human si Mayor Socrates mitumbok kaniya nga usa sa responsable nga wala dayon ma-liquidate ang cash advances nga gigamit sa festival sa milabay'ng tuig.

Si Fernandez bag-o lang usab nagkanayon nga kung ang mga organizer sa Inasal Festival mopahigayon pa og laing festival niining tuiga dili na siya mopirma og solicitation letter para sa maong proyekto.

Sa milabay'ng tuig ang dakbayan adunay natigom nga P1.9 milyones sa solicitation para sa proyekto apan migasto kini og P3.2 milyones diin ang siyudad mipagawas og P700 mil nga gipuno sa galastohan.

Si Belleza mihangyo og pinansiyal nga suporta ni Gobernador Gwendolyn Garcia ug Kongresista Eduardo Gullas nga P800 mil para sa ipahigayong festival niining tuiga.

Karong Oktobre 15 mao ang pista sa siyudad diin giplano ni Belleza nga hiusahon ang dakong parada sa Inasal ug sa Halad diin adunay mga sayaw nga ihalad para sa patrona sa siyudad Santa Teresa de Avila.