Ang maong lalaki gidala ni Luis Formentera, konsehal sa barangay diha sa police station sa lugar.
Si Formentera nagkanayon nga ang maong tawo dili motubag dihang ila kining gipangutana sa ngalan ug diin siya maggikan lakip na ang kapolisan wala usab kini nakuhang impormasyon.
Si SPO1 Virgilio Concepcion, polis sa San Francisco mibutyag nga ang maong lalaki misuwat og ngalan "Sanny Aton" dihang iya kining gipasuwat diha sa papel.
Apan wala kini motubag dihang gipangutana kini kung kinsa si "Aton".
Si Concepcion midungag nga posibleng adunay sakit sa pangisip ang maong tawo tungod kay usahay maghubo kini.
Gituhoan sa mga polis nga ang mga paryente sa maong lalaki ang mikadena sa tiil niini ug nakahigayon kini sa pag-ikyas.
Gibana-bana nga sobra sa 30-anyos na ang panuigon sa maong tawo, brown ang kolor sa panit niini, medium ang gidak-on sa lawas, adunay gitas-on nga 5'4, tul-id ang buhok, nagsul-ob og blue nga short pants ug t-shirt.
Gitugyan kini sa kapolisan sa Department of Social Welfare and Development (DSWD) apan giuli kini sa DWSD ngadto sa mga polis para ipa-safe keeping.