Si CCPO director Melvin Gayotin nagkanayon nga dili kalikayan nga apilon og imbestigar ang anggulo sa politika sanglit si Parilla usa sa mga iladong politiko sa maong lalawigan.
" Well, the investigation is still going on, ang atong initial nga action is ma-file nato karon ang kaso kay na-identify man siya sa witnesses," asoy pang Gayotin.
Kini bisan paman sa nigawas nga pamahayag sa suspek nga si Eugenio Corpin kagahapon sa interbyu sa mga lokal nga sibyaanan kabahin sa giingong pagkulata kaniya sa biktima niadtong Septembre 2 diha sa pantalan sa Naval.
Si Parilla nagsugod sa pagka-politiko sa Biliran dihang gitudlo kining Bise-gobernador niadtong 1992, nahimo siyang elected Vice Governor sa maong lalawigan niadtong 1994 ug nakadaog usab pagka-gobernador niadtong milabay'ng 1998.
Napilde siya dihang midagan pagka-gobernador niadtong 2001 atbang kang Rogelio Espina, ang anak sa iyang Bise-Gobernador niadtong 1998 nga si Gerry Espina, napilde siya pag-usab sa pagka-mayor niadtong milabay'ng eleksyon diha sa Naval diin iyang kaatbang mao si Gerry Espina.
Si Naval Mayor Gerry Espina sa pakighinabi sa DySS kagahapon sa buntag mitug-an nga wala silay laing nahibaw-ang gikabangi si Parilla gawas lang kang Corpin ug personal ang motibo niini dihang gikulata ang naulahi sa biktima.
Matud pang Espina nga makasabot siya nga iduhig gyud ang politika sa kamatayon ni Parilla.
Si Espina miangkon nga si Corpin layo na kaayong paryente sa ilang pamilya maong gikuha kining bodyguard sa iyang anak niadtong 2004 elections gumikan sa mga hulga, apan niadtong 2005 gitangtang kini pagka- security agent 1 sa Kapitolyo.
Ang kapolisan nangita pa karon sa laing duha ka mga kauban ni Corpin nga daling nakasagol sa mga tawo human ang pagpamusil.