Nabugtuan sa iyang kinabuhi human sa pipila ka oras nga pag-atiman sa mga doktor sa Chong Hua Hospital si Atty. Danilo Parilla, 52, taga Naval, Biliran tungod sa usa ka igo sa bala diha sa luyong bahin sa ulo nga milapos diha sa agtang.
Nadakpan ra dayon ang suspek nga giilang si Eugenio Corpin,56, nga taga Naval, Biliran ug may balay diha sa Basak ning dakbayan.
Sumala pa sa imbestigasyon ni SPO2 Zenaido Pastorfide sa Homicide Section, si Parilla kinsa kanhi gobernador sa Biliran kasamtangang nag-uban sa iyang asawang si Susan nanganaog sa barko dihang gisundan sa suspek diha sa luyo ug gipusil makausa.
Usa ka 28 anyos nga babayeng testigo kinsa diha mismo sa luyo sa biktima ang positibong mitumbok kang Corpin nga maoy tawong miwakli kaniya ug mipusil sa ulo ni Parilla.
"Nakit-an gyud nako nga siya ang mipusil, iya pang gitap-inan ang ulo dayon gipusil, natumba si Kuya Danny sa ako gyung atubangan unya nihupo naman ko nangayo ko og tabang" sumala pa sa testigong gikahinabi sa Banat News.
Matud pa sa testigo kinsa naa na sa kostudiya sa Homicide Section nidagan pa ang suspek padulong sa ubos nga bitbit pa niini ang armas. Sumala pa niini nga duna pay laing duha ka kauban si Corpin sanglit nianang pagkagabii giduol siya sa usa niini ug nagpatabang unsaon paggamit sa iyang cellphone, samtang ang laing usa ug si Corpin nag-inom sa ilang teheras.
Diha sa tiilan sa damyo sa barko dunay nagpaabot nga mga sakop sa Mobile Patrol Group nga mianha diha aron pagprotektar kang Parilla.
Gikatahong nianang gabhiuna samtang naglawig ang barko namatikdan sa biktima ang suspek.
Sumala pang Edwin Dilao sa Base Control sa Mobile Patrol Group nga nakadawat sila og tawag gikan sa nagpailang Rico Lucena alas 4:57 sa kaadlawon sa Mobile Patrol Group nga nangayo og proteksyon kay dunay hulga sa kinabuhi ang iyang uyuang si Parilla.
Ang mga sakop sa MPG nga sila si PO3 Jaime Apari, PO1 Junicar Estiñoso ug PO1 Rommel Mediodia kinsa nagpaabot kang Parilla diha sa ubos mao usab ang midakop kang Corpin samtang kini misagol sa mga tawong naglumba na og kanaog sa damyo human sa pagbuto.
Ang suspek napuno sa bun-og ug diriyot mapusa ang tuong mata dihang gidala sa buhatan sa Criminal Investigation and Intelligence Branch sa Cebu City Police Office.
Si Chief Inspector George Ylanan sa pakighinabi sa Banat News nagkanayon nga si Corpin nakumbikto sa kasong pagpanulis kaniadto ug gihatagan og 'probation' sa korte.
Si Corpin kinsa kanhi Security Agent 1 sa miaging tuig sa Kapitolyo sa Biliran ilawom sa pamunoan ni Gobernador Rogelio Espina sa pakighinabi sa mga tigbalita kagahapon mitug-an nga gikulata siya ni Parilla niadtong Septembre 2 diha sa pantalan apan kusganong mihimakak sa pasangil nga siya maoy mipusil sa gobernador.
Gitumbok ni Corpin ang usa ka Norberto alyas Norbing nga wala niya mahibaw-i ang apelyedo nga maoy mipusil sa gobernador ug ang armas gipasa ra diha sa iyaha ug iya usab gisulod sa iyang bag.
Usa ka kalibre 45 pistola nga may pito ka buhing bala diha sa magazine ug laing siyam ka reserbang bala ang nasakmit sa kapolisan diha sa posesyon ni Corpin. Gipailawom dayon sa paraffin test si Corpin kagahapon ug gihatagan og medikal nga atensyon.