Sugbuak bill patyonon

Patyon sa mga kongresista ang tulo ka balaudnon tumong sa pagbuak-buak sa lalawigan sa Sugbo atol unya sa pagtuki niini sa plenary.

Kini ang gipahibawo ni Kong. Nerissa Soon-Ruiz sa ikaunom nga distrito sa lalawigan sa Sugbo kinsa supak sa maong mga balaudnon.

Matud pa ni Ruiz nga daghan sa mga kongresista sa Kabisay-an ug Mindanao ang supak sa balaudnon.

Ang tulo ka balaudnon giduso nilang Kong. Simeon Kintanar alang sa Cebu del Sur, Kong. Antonio Yapha Jr. alang sa Cebu Occidental ug Kong. Clavel Asas-Martinez alang sa Cebu del Norte.

Matud pa ni Ruiz nga gidali sa House Committee on Local Government ug House Committee on Rules ang pagpasaka niini ngadto sa Plenary aron makaapil na sa pagdebate ang uban nga supak niini.

Sumala pa ni Ruiz nga wala magpasabot nga ang mga kongresista nga namirma sa committee level mopabor usab kini sa plenary.

Si Ruiz niingon nga nipirma ang mga kongresista sa komitiba aron mapasaka ang balaudnon ngadto sa Plenary.

Nasayran nga gibasura ang motion for reconsideration sa pag-aprobar sa balaudnon sa committee level ug gitakda na kini alang sa second reading sa committee on rules.