Si Belleza misugyot sa mga drayber nga mopadala og pormal nga hangyo ngadto ni gobernador Gwendolyn Garcia tungod kay ang grupo nagplano usab nga ipaabot nila sa gobernador ang ilang problema aron mahatagan kini og pagtagad.
Si Jose Lapuerta, presidente sa Reform Movement of All Tabunok Operators and Drivers Association (REMATODA), nagkanayon nga sulod sa upat ka tuig sukad ang Citilink Terminal mi-operate pangayoan sila og P20 nga terminal fee inig sulod nila diha sa Citylink sukwahi sa ilang gikasabutan tali sa tagdumala nga P9 lang ang ilang bayarang terminal fee.
Kun dili usab sila mosulod sa terminal aron manguha og pasahero dakpon sila.
Si Lapuerta mipasangil nga ang sobra nga ilang gibayad nga wala malakip sa kasabotan gigamit sa maintenance sa mga unit sa multicab nga gigamit sa tagdumala nga walay pagtugot sa mga drayber nga mohakot og mga pasahero paingon diha sa Colon.
Matud ni Lapuerta nga sa usa ka tuig mokabat sa P60 mil ang terminal fee nga mabayad matag drayber diin adunay sobra sa 80 ka drayber ang magbayad og terminal fee.
Ang mga drayber mireklamo usab tungod kay naapektohan ang ilang income sukad nga na-implementar ang ordinansa sa pagdili og pagsulod diha sa Colon sa mga rota gikan sa habagatan.
Kasagaran sa mga pasahero nga mga taga Talisay ug Tabunok dili moanha sa Citylink, diha na kini mosakay og PUJ sa Colon paingon sa Pardo kun dili sa Basak ug anha kini manganaog aron mosakay na pud og PUJ paingon sa ilang paulian.
Kaniadto adunay sobra 100 ka PUJ nga dunay rotang Tabunok apan karon uban kanila nag-ilis na og mga rota.