Sunog mipatay 3 ka bata gisusi pa

Padayon pang nag-imbestigar ang kapolisan sa lungsod sa Alegria sa nahitabong sunog niadtong Huwebes sa gabii sa Sitio Alangasil, Madredijos, Alegria diin mikalas og tulo ka mga bata human maugdaw ang panimalay sa pamilyang Lastimoso.

Dugang nasayran dunay 12 ka mga anak sila si Alfredo ug Julia Lastimoso, ang usa ka anak niini nahimong kandidata sa kapistahan sa nahisgotang lugar.

Kahinumduman wala na mahitsura ang kalawasan sa tulo ka mga anak ni Lastimoso nga mao sila si Jessa, 3, Efralin, 2, ug Christian, 1.

Si Christian diha pa sa duyan nakit-an nga paig na ang lawas.

Ang maguwang nga si Maretel, 7, maoy naluwas kay milayat paingon sa gawas human makakita sa kalayo nga nagkatay na sa ilang panimalay.

Ang kapolisan ug kabomberohan sa Alegria nagkanayon nga mikabat og P20 mil ang danyos sa sunog.

Si Sr. Insp. Deonpe Español miingon nga wala magamit ang firecycle nga gidonar sa kapitolyo pagtubag sa maong alarma, tungod nahutdan sa karga kay gigamit naman pagtubag sa miaging sunog.

Ang mayor sa Alegria nga si Mayor Raul Guisadio mipadayag nga mohatag og hinabang sa pamilyang Lastimoso.

Giawhag ang mayor sa pamilyang Lastimoso nga wala gayud unta biyai ang tulo ka mga anak nga walay gibilin nga kasaligan.

Si Gobernador Gwendolyn Garcia nasayran nga andam mohatag og ayuda sa pamilyang Lastimoso.