Mga walhon sa Tangke gikabalaka

Misamot karon ang problema sa mga opisyal sa gobiyerno sa Tangke, Talisay City tungod niining pagdagsang karon sa mga "cause oriented" nga grupo nga nakadugang sa suliran sa ilegal nga drugas.

Matud pa ni Kapitan Juanita Mabala nga wala man gani siya kapahuway ning suliran sa shabu ug uban pang matang sa ilegal nga drugas, nia na usay makapabalakang kalihokan sa mga rebelde.

Nasuta ni Mabala nga misempatiya diay sa mga komunistang New People's Army (NPA) ang kasagarang mga miyembro sa Bayan Muna, Anakpawis ug uban pang grupo diha sa Tangke dihang nadakpan sila si Sharon Abangan ug Gerard Labadia nga pulos mananagat diha sa maong lugar niadtong Biyernes.

Ang Tangke ug ang silingang barangay niini nga San Roque, giyak-an sa mga NPA Sparow Unit niadtong mga sayong tuig sa 1980.

Mao kadtoy nakapabaniog sa lungsod pa ang Talisay kaniadto nga "killing field" tungod sa matag karon ug unya nga pagpangihaw sa mga molupyo diha pinaagi sa NPA.

Ang inila ug popular kaayong kumander sa NPA nga si Kumander Teban nga maoy naglihok dihang mga lugara maoy gikaintapan kaniadto sa molupyo.

Matud pa ni Mabala nga nabalaka siya basin mobalik na usab ang pagka- 'killing field' sa Talisay, karong panahona.

Maoy hinungdan nga iya nang gikonsulta kining iyang kabalaka ngadto kang legal officer Aurora Econg sa dakbayan sa Talisay.

Si Econg usab sa iyang bahin padayon nga naniid sa dugang pang mga kaugmaran diha sa Tangke.