Ang gipasanginlan ug kasamtangan gikustodiya sa kapolisan giila nga si Eugenio Dinuyo Gimenez, hingkod, ulitawo, nanimuyo sa naasoy'ng lugar.
Si Gemma Nacua, biyuda ug nagpuyo sa maong lugar maoy mitaho sa kapolisan nga ang iyang anak nga si Christine, 14, ang midangop sa kapitan sa Tubod ug nangayo'g tabang human siya ug ang iyang half-sister giingong gipangtionan og mahait nga hinagiban ni Gimenez.
Si PO1 Ricky Larrobis, desk officer sa Minglanilla sa pakighinabi sa Banat News miingon nga selos ang hinungdan sa hitabo.
Nasayran sa Banat News nga si Gemma nabiyuda human mamatay niadtong Disyembre sa miaging tuig ang iyang bana nga igsoon ni Eugenio ug dunay duha ka mga anak.
Matud pa si Eugenio pirme kining magselos ngadto ni Gemma human dunay mga lalaki nga buot mamisita kaniya sa ilang panimalay, asoy ni SPO2 Larrobis.
Si SPO2 Larrobis miingon nga nangulitawo si Eugenio ngadto ni Gemma niadtong bulan sa Pebrero ning tuiga, duha ka bulan ang milabay human mamatay ang iyang igsoon nga maoy nabana ni Gemma.
Apan giingong wala kini sugta sa babaye nga maoy hinungdan nga pirme kining magselos bisan paman nga usa ra ka balay ang ilang gipuy-an.