Militante wa matandog

Wala matandog ang grupong Bayan bisan paman sa pangangkon sa kapolisan ug militar kabahin sa giingong nabistong planong kalihukan sa mga militanteng pundok nga tambungan usab sa mga langyaw'ng militante karong umaabot nga ASEAN Summit.

Si Jaime Paglinawan sa Bayan mitug-an sa Banat News nga tinuod nga dunay dakong kalihukan ang mga militanteng pundok karong Disyembre aron ipaabot sa mga miyembro sa ASEAN nga di magpailawom sa kapitalistang Amerikano.

Apan gipanghimakak ni Paglinawan ang pasangil nga ang pundong ilang gamiton gikan sa revolutionary tax nga nakolekta sa grupong New People's Army.

Niadtong milabay'ng adlaw, ang Criminal Investigation and Detection Group 7 mitug-an nga gitug-anan sila sa gidudahang mga sakop sa New People's Army nga sila si Gerard Labadia ug Sharon Abangan kabahin sa Asia Pacific Conference on International Leagues of People's Struggle.

Sumala pa nga ang pundo maggikan sa extortion money gikan sa mga negosyante dinhi sa lalawigan nga gisugdan na niadto pang milabay'ng tuig.

Sumala pa sa laing opisyal sa militanteng pundok nga si Paul Rodriguez sa pakighinabi sa DyLA kagahapon nga ang pundo maggikan sa mga militanteng pundok gikan sa mga adunahang nasud ingon man ang amot sa mga miyembro.

Si Paglinawan midugang nga gitunong sa ASEAN Summit ang ilang kalihukan tungod kay hisgutan sa maong mga miyembrong nasud ang kampanya sa terorismo ug pagtuki sa tawhanong katungod sa mga tawo.

Alang sa Bayan si Presidente Gloria Arroyo ug Gobernador Gwendolyn Garcia maisip nga malapason sa maong katungod ug dili angayang dinhi sa Pilipinas himoa ang ASEAN tungod sa mga political killings ug uban pa.

"Dili gyud haom si Presidente Gloria Arroyo nga mo-host sa ASEAN kay kung gikwestiyon nila ang Myanmar sa human rights violations, mao man usab ang gipanghimo nila dinhi," asoy pang Paglinawan.

Kahinumduman nga ang Myanmar man unta ang venue sa 12th ASEAN Summit apan gumikan sa mga politically motivated -violations sa katungod sa popular nga babayeng lider nga si Aung San Su Kyi kinsa gi-house arrest sa military junta sa maong nasud wala mahinayon ang maong plano ug gibalhin dinhi sa Pilipinas.