Mango Square gikiha sa mga nag-abang ngadto sa korte

Gipasakaan og kaso sa korte ang Mango Square Mall sa may dalan Gen. Maxilom Avenue sa dili mominos 10 ka mga tenants niini human gipamutlan og linya sa kuryente sa management ang mga edipisyo nga ilang giokupahan.

Ang mga nag-abang nga negosyante sa Mango Square nagpanon kagahapon sa buntag paingon sa korte aron ipasaka ang kasong civil batok sa management.

Si Atty. Francisco Amit Jr., ang abogado sa mga reklamante mipadayag nga kasong breach of contract of lease ingon man damages batok sa gihimo sa Ludo and Luym Development Corporation.

Gisukip sa reklamo ang ilang prayer for preliminary mandatory injunction.

Gireklamo sa maong mga tenants sa Mango Square ang pagputol sa linya sa suga ug kuryenti sa ilang giokupahan nga mga edipisyo gumikan kay duna silay gipirmahang kontrata alang niini.

Ang management sa Mango Square miputol sa linya sa kuryenti sa mga tenants niini nga dunay daghang mga kalapasan sa balaod sa dakbayan.

Kini sama sa kapakyas paglukat og mayors permit, pagsunod sa building code ug fire code ingon man ang kapakyas pagbutang og parking area sa mga kustomer ug labaw sa tanan ang pagpasundayag og mga law-ay'ng talan-awon ngadto sa mga kustomer ug ang pagpamaligya og ilimnong makahubog ngadto sa mga minor de edad ug mga estudyante panahon sa kagabhion.

Gikonpirmar ni Mayor Tomas Osmeña ang pagpangayo og gamay'ng lugway sa management sa Mango Square aron ilang makorihian ang tanang mga depekto ug kalapasan.

Mitug-an ang mayor nga mohatag siya og konsiderasyon basta iyang makita nga gi-asikaso na niini ang pagkorehir sa mga depekto sa maong edipisyo.