Nahitabo ang pagpamusil sa Taboan, Awayan, Poblacion 3, Carcar niadtong miaging buntag.
Ang biktima mao si Dino Dumango, 22, ulitawo nga taga dalan P. Burgos, barangay Poblacion 2 sa nahisgotang lungsod.
Si PO3 Erving Avila nga gikahinabi sa Banat News miingon nga gikan pa si Dumango namaligya og ampaw sa Ceres bus nga mi-parking.
Nagdali sa pagkanaug sa maong sakyanan ang biktima dihang milarga na ang maong sakyanan ug nagdali kini sa pagsulod sa Taboan alang sa pagpahimutang sa ampaw nga iyang dala.
Matud pa ni PO3 Avila nga ang wala hiilhing lalaki nga nagbarog sa luyong bahin sa biktima sa sulod sa maong dapit ang kalit lang namusil ug naigo ang luyong bahin sa ulo niini .
Dugang pa niya nga ang mamumuno daling misakay og motorsiklo nga gidala sa wala mailhing tawo ug mipabulhot sa pagpadagan pahilayo.
Miingon si PO3 Abella nga ang biktima walay dautang record sa ilang buhatan ug dili usab kini sakop sa fraternity nga maoy nakahatag karon kanila og kalibog sa hinungdan sa maong pagpamusil.