Dakong sayop pagbalhin sa Norkis gikan Mandaue

Usa ka dakong sayop alang sa mga magpapatigayon nga magtinguha sa pagbiya sa dakbayan sa Mandaue ug pagbalhin sa patigayon ngadto sa laing dapit dinhi sa Sugbo.

Kini ang gipadayag sa press statement ni Mayor Thadeo Ouano kagahapon isip reaksiyon sa pamahayag ni Atty Norberto Quisumbing, tag-iya sa Norkis Trading Industries nga nagtinguhang mobalhin sa laing lugar.

Matud pa ni Ouano nga usa ka sayop alang sa mga magpapatigayon nga nagplano sa pagbiya sa dakbayan ug pagbalhin sa ilang negosyo ngadto sa laing dapit dinhi sa Sugbo.

Gipasalamatan ni Ouano ang mga negosyante sa dakbayan nga nagpabilin pa gihapon ang pagsalig sa iyang administrasyon ug iyang gipaneguro nga himuon niini ang tanang pamaagi alang sa pagbaton sa ekonomikanhon kalambuan sa Mandaue.

Subay sa taho sa Regional Development Council sa Central Visayas nga ang Mandaue maoy labing paspas nga nagbaton og kalamboan sa rehiyon sa tuig 2005 diin 70 porsiyento sa total nga gidaghanon sa gibaligyang produkto sa gawas sa nasud gikan sa furniture sector nga maoy hinungdan nga giila ang dakbayan nga furniture capital sa nasud.

Dugang pa niya nga ang ekonomiya sa Mandaue miusbaw kini ngadto sa 34.6 porsiyento nga mas labaw kay sa siyudad sa Sugbo nga anaa lamang sa 18.26 ug uban anaa sa tres porsiyento.

"Business confidence continues with the steady rise of gross from P44 billion in 2001 to P72 billion in 2005. It is twice as fast as the national average," nagkanayon si Ouano.

Si Ouano miingon nga ang annual budget sa tuig 2001 napilo pa ngadto sa tulo kabahin nga pag-usbaw pinaagi sa nagkadaghang micro, small, medium ug dagkong patigayon nga mokabat lamang sa 5,000 nga gidaghanon sa 2005 nga nakitang misaka kini ngadto sa 100 porsiyento.