Ang gidakop giilang si Julie Nabua,31, taga dalan A. Lopez sa Mahayahay, Calamba ning dakbayan kinsa mitunol og P70,000 ngadto kang Ylanan bugti nga buhian ang iyang maguwang nga si Francisco Nabua alyas Patok,33.
Si Francisco gitumbok nga usa ka level two drug pusher sa nahisgutang lugar nasikop niadtong Biyernes sa hapon sa mga sakop sa Vice Control Section pinanguluhan ni PO3 Jeffrey Larobis.
Usa ka paketeng shabu nga napalit sa poseur buyer og P200 ug laing usa pa ka paketeng shabu diha sa bulsa ni Francisco ang nakuha sa maong operasyon.
Matud pang Ylanan nga human masikop si Francisco miduol kini kang Larrobis ug mihangyo nga kung mahimo aregluhon nalang ang kaso bugti sa kwartang ilang ihatag.
Si Ylanan human makadawat sa report mimando nga ipalaang dayon ang tawong "mohatag" sa suborno, apan dihang iyang nasayrang dili ig-unsa ni Francisco ang motunol wala mosugot ang opisyal tungod sa posibilidad nga mapilde ang kasong bribery nga ilang ipasaka tungod kay mahimong di angkunon ni Francisco ang maong tawo ug ang suhol.
Apan kagahapon sa buntag, mitawag ang mga sakop ni Ylanan nga nagpahibalong mianha ang igsuon ni Francisco nga si Julie ug nihaylo pag-usab sa suborno.
Ning tungura giandam ni Ylanan ang laang ug diha nahitabo sa buhatan sa CIIB ang "binayranay" nga nasaksihan sa pipila ka mga sakop sa media nga mipahipi diha sa usa ka lawak nga may one-way mirror.
Si Julie dihang gikahinabi sa Banat News unang mihimakak sa pagsuborno kang Ylanan, apan dangtan pila ka gutlo mitug-an kining ang asawa sa iyang maguwang nga si Daling Villanueva maoy misugo kaniya nga ipahatag ang maong salapi aron pabuhian si Francisco.
Si Francisco sa iyang bahin kusganong mihimakak nga iyang gisugo ang iyang mga kabanay nga luwason siya sa pagkabilanggo pinaagi sa pagsuborno.
Matud pang Ylanan nga posibleng naanad na ang mga drug pushers nga subornohan ang mga polis nga matag sila madakpan maong misuway usab kini og suborno kaniya.