Ang biktima mao si Ernesto Ambrocio, 43 anyos, minyo nga taga Poblacion Occidental sa lungsod sa Consolacion.
Si P02 Milven Pelayo sa Presinto 3 sa Basak Police Station nga gikahinabi sa Banat News miingon nga gikan sa dakbayan sa Sugbo ang PUJ nga gimaneho ni Herloui Armacin, 23, minyo nga taga Pulpogan.
Matud pa ni PO2 Pelayo nga paghidangat sa PUJ sa Jagobiao sa eskina Everly Child Sanitarium ang upat ka pasaherong lalaki ang mideklarar og tulis.
Human makakuha og mga butang sa pasahero ang tulo ka tulisan, nagdali sila sa pagkanaug apan ang kauban niining naglingkod sa front seat ang mition pa og kutsilyo sa drayber ug gikuha ang cellphone niini.
Si Ambrocio nga naglingkod sa luyo sa drayber midali pagbarog ug gipatiran ang tulisan ug nahagbong kini sa yuta.
Wala dayon makapadagan ang drayber sa sakyanan kay nasangit ang ligid sa gutter sa dalan ug ang tulisan nga dali kaayong nakabarog mikab-ot pa pagdunggab kang Ambrocio nga didto sa sulod sa sakyanan.
Si Ambrocio nga naigo sa lubot dali usab nga gidala sa drayber ngadto sa Vicente Sotto Memorial Medical Center.