'Namuso' misurender

Misurender niadtong Lunes sa hepe sa kapolisan sa Barili ang usa ka 43-anyos nga lalaki kinsa gipasanginlang mipusil sa bana sa iyang silingan nga iyang sigehan og lili.

Ang insidente sa pagpamusil nahitabo niadtong milabay'ng semana diha sa Barangay Azucena lungsod sa Barili.

Si Police Inspector Ricardo Nayne, mibutyag kagahapon sa Banat News nga si George Gadiano nagpakita og kaibog sa asawa sa biktima nga si Hermigildo Maningo, 33-anyos, pulos residente sa nahisgutang lugar.

Gibutyag ni Nayne nga sigehan og lili ni Gadiano diha sa sulod sa ilang balay ang asawa ni Maningo ug ang suspetsado mosulti og mga law-ay nga pulong ngadto sa asawa sa biktima.

Ug tungod sa kalagot sa asawa ni Maningo ngadto ni Gadiano mitug-an kini sa iyang bana.

Niadtong Huwebes sa milabay usab nga semana gikomprontase ni Maningo si Gadiano ug pagkasunod adlaw gipusil sa suspetsado ang biktima gamit ang .38 kalibreng pusil dayon ikyas.

Si Maningo nakaangkon og samad pinusilan sa tuong bukton ug walang paa diin ang bukog niini nga naigo sa bala nabuak.

Matud ni Nayne nga si Gadiano diha magtago sa iyang paryente sa Sityo Nonoc, Barangay Tabunok Talisay.

Ang paryente ni Gadiano mitawag ni Nayne tungod kay gustong mosurender ang suspetsado.

Si Gadiano nadetiner karon sa Barili detention cell ug nag-atubang sa kasong frustrated murder nga giduso sa paryente ni Maningo batok kaniya.