Mga medisina gi-hold sa BOC-Mactan

Unom ka kahon sa medisina ang gipugngan sa Bureau of Customs Sub-Port of Mactan kay gidudahan kining pinalusot sa milabay'ng gabii.

Matud pa ni CIIS Supervisor Franz Angelo Muñoz base sa ilang intelligence report dunay ipalusot nga mga medisina nga gikan sa gawas sa nasud ug ipaagi sa domestic cargo hinungdan sa ilang paghimo og surveilance.

Niadtong milabay'ng Huwebes sa gabii, Agosto 31, 2006 dunay impormasyon nga dunay miabot nga mga kinahon nga medisina sa Cebu Pacific cargo nga gikan sa kauluhan hinungdan nga ila gihiling ang maong kargamento.

Nasuta sa mga sakop sa CIIS nga unom ka kahon sa assorted medicine ang positibong gikan sa kaulohan ug kini nakapangalan ngadto kang Carolina Montesclaros.

Matud pa ni Muñoz nga si Montesclaros nga taga Talisay City nasikop na sa Mactan Cebu International Airport arrival section sa milabay'ng bulan nga nagdala og duha ka bag sa assorted nga medisina diin ang kasong smuggling anaa na gipasaka sa Lapu-Lapu City Prosecutors Office.

Matud pa ni Muñoz nga misuway og kuha sa maong kargamento si Montesclaros sayo sa buntag pagkasunod adlaw apan napakyas kini human nga ang CIIS miluwat na og hold order uban sa pagtugot ni Cebu Customs District Collector Recardo Belmonte ug Sub-Port of Mactan Collector Atty. Ernesto Urbano.

Sa milabay'ng Biyernes wa mopatim-aw si Montesclaros ngadto sa buhatan sa Customs Mactan hinungdan nga nagplano ang mga sakop sa CIIS nga ila kining ibalhin ngadto sa Customs bonded warehouse.

Dugang pa ni Muñoz nga gikumpirmar sa BFAD nga ang unang mga medisina nga nakumpiskar kang Montesclaros nagpakita sa resulta nga mga counterfeit drugs ang iyang nadala gikan sa gawas sa nasud.

Gumikan niini hatagan og 30 ka adlaw si Montesclaros sa pagkuha sa maong kargamento ug kung mapakyas kini kumpiskahon pabor na sa gobiyerno.