Gibukbok, gigaid sa 'bayot'

Usa ka mahuyang ang nadakpan ug naputos og bun-og sa mga residente ug kabanay sa usa ka babayeng iyang biktima sa pagpangawat nga iya usab gibukbok og botelya sa pahumot diha sa sulod sa balay niini niadtong Biyernes sa hapon.

Ang insidente nahitabo diha mismo sulod sa balay sa biktimang si Vanessa Arieta, hingkod ang panuigon, diha sa dalan Lily, Bliss Site sa barangay Labangon ning dakbayan.

Ang suspek giilang si Nislito Delcorro,28, nga taga Pook, Talisay ug lumad nga taga Tudela , Camotes.

Sumala pa ni SPO1 Gualberto Oghoc sa pakighinabi sa Banat News nga ang pag-umangkon sa biktima nga si Melmark Manugas maoy nakadakop sa suspek human kini misuway na og ikyas.

Gikatahong una pa madiskubrehi ang pagpangawat sa suspek, dunay kakunsabong 10 anyos nga batang lalaki ang suspek nga maoy nangayo og tabang kang Arieta diha sa atubangang bahin sa ilang balay.

Samtang giatiman sa biktima ang bata, wala damha nga miagi diha sa likod sa balay si Delcorro ug milahos ngadto sa ikaduhang andana diin ang lawak sa biktima mahimutang ug gipanguha ang kabtangan ug sinina niini.

Apan si Arieta misaka og balik sa balay ug diha niya maaktuhi si Delcorro nga naa sa sulod sa iyang lawak ug nangukay sa mga gamit, dihang iyang gisukmatan gikatahong gibukbok siya niini og botelya sa perfume makadaghang higayon, human maluya gibinaklid siya og gaid sa suspek gamit ang usa ka habol.

Ang pag-umangkon sa biktima kinsa misaka usab sa ikaduhang andana maoy nakakita sa gibuhat sa suspek hinungdan nga gigukod niya kini hangtud sa ganghaan diin iya kining naabtan ug dihay mga estambay ang nitabang og kulata sa suspek.

Ang biktima daling gidala sa usa sa mga tambalanan samtang nabalhog sa karsel si Delcorro.

Narekober gikan sa suspek ang kwartang P1,650 gikan sa pitaka sa biktima, mga sinina ug sunglasses.