Drayber girapido patay

Patay ang usa ka traysikol drayber nga gipusil sa tulo ka wala hiilhing lalaki nga nagsakay og motorsiklo sayo kagahapon sa buntag sa dalan Maximo Patalingjug, Pajo dakbayan sa Lapu-Lapu.

Ang biktima mao si Warren Molde Comendador, 27 anyos, ulitawo ug nagpuyo sa Sangi, Pajo sa nahisgutang dakbayan.

Si PO3 Alcon Esconzura sa homicide section sa kapolisan sa maong dakbayan nga gikahinabi sa Banat News miingon nga naglingkod lang ang biktima sa gimaneho niining traysikol dihang tulo ka wala hiilhing lalaki nga nagluwan sa kolor gray nga motor ang kalit lang milabay ug ang usa sa nag-angkas ang kalit namusil duha ka higayon sa biktima.

Matud pa ni PO3 Esconzura nga tungod sa samad pinusilan sa lawas ug liog agi sa kalibre .45 pistola nakabsan sa iyang gininhawa ang biktima.

Human sa maong pagpamusil ang tulo ka wala hiilhing mamumuno ang dali usab nga mipahilayo sa maong dapit.

Si PO3 Manolito Abellanosa ug mga kaubanan sa homicide section nga maoy nakatubag sa alarma ang nagtuo nga gipusil ang biktima sa kalibre 45 nga pistola.

Si PO3 Abellanosa miingon nga ang hinungdan sa maong pagpamusil ang wala gayod nila masuta ug kini padayon pa nilang gihimuan og pakisusi.