Wala na mahitsura ang kalawasan sa tulo ka bata nga sila si Jessa, 3, Efralin, 2, ug Christian, 1, pulos may apelyedong Lastimoso, tungod sa pagkapaig.
Ang usa ka tuig nga si Christian diha pa sa duyan nakit-an nga paig na ang lawas atol sa paglurang sa kalayo
Ang ilang maguwang nga si Maretel, 7, naluwas atol sa sunog human milayat sa pultahan pagkakita nga mikatay na ang kalayo sa ilang panimalay, biniyaan ang tulo niya ka mga manghod nga nangatulog atol sa pag-ulbo sa kalayo.
Si Sr. Insp. Deonpe Español, hepe sa Alegria Police Station, nga nahinabi sa Banat News nagkanayon nga wala diha ang ginikanan sa upat ka bata nga sila si Alfredo ug Julia Lastimoso tungod kay miadto sa plaza aron pagsaksi sa kalingawan.
Atol sa insidente, adunay pasundayag nga combo nunot sa kapistahan nga gisaulog sa naasoy'ng lugar.
Nasayran sa Banat News nga sa wala pa mobiya ang magtiayong Lastimoso, si Julia giingong nagtak-ang.
Matud pa ni Sr. Insp. Español nga usa sa gituohang hinungdan sa kalayo nga mipatay sa tulo ka bata mao ang baga sa abuhan nga gibiyaan ni Julia nga naglung-ag.
Dugang pa niya nga siya mismo ang nakadawat og text message kabahin sa maong alarma sa sunog.
Apan pag-abot nila sa panimalay sa mga Lastimoso naugdaw na kini.
Si Sr. Insp. Español miingon nga walay firetruck ang lungsod sa Alegria. Wala magsilbe ang firecycle nga gidonar sa Kapitolyo tungod kay sudlonon ang panimalay sa mga Lastimoso nga dili maagian og sakyanan.