Bala miigo sa ilong lapos ngadto sa ulo

Gipusil sa chairman sa Lungsod Batok Salaod (Lubas) nga silingan niini ug naigo sa nawong ug ilong nga ang bala milapos sa luyong bahin sa ulo ug namatay.

Nahitabo ang pagpamusil alas 11 pasado ang takna sa miaging gabii sa barangay Sabang, dakbayan sa Danao.

Ang biktima mao si Genes Gemino, 33, minyo nga nagpuyo sa maong dapit.

Si Anaclito Macmac Jr., 30, minyo nga silingan sa biktima maoy suspetsadong nagpusil sa biktima.

Sa pagpakighinabi sa Banat News kang SPO4 Teofilo Deguilmo maoy nasayran nga ang duha nagkalalis sa wala pa usab nila mahibaw-ing hinungdan.

Matud pa ni SPO4 Deguilmo nga taliwala sa mainitong panaglalis ang suspetsado nga nagluklok og armas nga wala matino ang kalibre kalit lang miibot niini ug gipusil ang biktima.

Dugang pa niya nga nagdali sa pagsibat ang suspetsado human sa maong pagpamusil ug wala na kini maabti sa maong dapit sa mialarmang sakop sa kapolisan.

Hinuon si SPO4 Deguilmo miingon nga padayon ang ilang pagpangita sa mamumuno nga ilang gituohang wala pa kini makapahilayo gawas sa Sugbo.